Татарстан Республикасы Министрлыклары Татарстан Республикасы Сәнәгать һәм сәүдә министрлыгы

Австрия-Россия дуслыгы җәмгыяте делегациясе белән очрашу

2017 елның 16 мае, сишәмбе

Бүген Татарстан Республикасы Хөкүмәте Йортында Татарстан Республикасы Президенты Рөстәм Миңнеханов Австрия-Россия дуслыгы җәмгыяте делегациясе белән очрашты. Чарада ТР Премьер-министры урынбасары – Татарстан Республикасы сәнәгать һәм сәүдә министры Алберт Кәримов катнашты.

Очрашу барышында ТР Президенты Татарстанның австрия партнерлары белән булган хәзерге мөнәсәбәтләр дәрәҗәсен бәя бирелүен һәм сәүдә-икътисадый, гуманитар хезмәттәшлек итүне киңәйтүгә зур игътибар ителүен билгеләп үтте. Рөстәм Миңнеханов кыскача республиканың сәнәгать һәм инвестицион потенциалы турында сөйләде, 2016 ел йомгаклары буенча регионның икътисадый эшчәнлеге нәтиҗәләренә тукталды.

Ул хәбәр иткәнчә, бүгенге көндә Татарстан австрия эшлекле даирәләре белән актив рәвештә хезмәттәшлек итә. Республикада «Винербергер» кирпеч җитештерү заводы эшли, «Сваровски» компаниясе белән уртак проектлар гамәлгә ашырыла, «Red Bull» дөньяга танылган Россия һәм Татарстан спорт командасы «КАМАЗ-Мастер»ның күпьеллык партнеры булып тора, берничә австрия банк структурасы эшләп килә, башка предприятиеләр белән дә үзара уңышлы хезмәттәшлек дәвам итә.

Алга таба австрия бизнес-җәмәгатьчелеге вәкилләре үзләренең компанияләрен тәкъдир иттеләр һәм Татарстан белән агросәнәгать комплексы, электрон түләү системалары, атлы спорт, туризм өлкәсендә хезмәттәшлекне үстерүнең төрле вариантларын тәкъдим иттеләр.

БАРЛЫК ЯҢАЛЫКЛАРНЫ УКУ

СОҢГЫ ЯҢАЛЫКЛАР

апрель, 2024 ел

Татарстанда хезмәт династияләре бүләкләнде

25 апрельдә Казанда Яз һәм Хезмәт бәйрәме алдыннан икътисадның төрле тармакларында республиканың горурлыгы булган хезмәт династияләрен хөрмәтләү булды. Республиканың сәнәгать һәм сәүдә министрының беренче урынбасары Родион Карпов «Татарстанның данлыклы хезмәт династияләре»н хөрмәтләүдә катнашучыларны котлады һәм бүләкләде.

Олег Коробченко Кытай делегациясе белән очрашты

Делегацияне Аньхой провинциясе Халык Хөкүмәте губернаторы урынбасары Сунь Юн әфәнде җитәкләде. Очрашу ТР Сәнәгать һәм сәүдә министрлыгында узды. Республика вице-премьеры – сәнәгать һәм сәүдә министры Олег Коробченко билгеләп үткәнчә, Татарстан белән Кытай арасында тышкы сәүдә әйләнеше елдан-ел арта бара, һәм хәзер ул рекордлы дәрәҗәгә җитеп, 3 млрд доллардан артып киткән. Ул Аньхой провинциясе белән хезмәттәшлек турында Хөкүмәт килешүе имзалануын һәм республика уртак документны гамәлгә ашыру кысаларында чаралар планын имзалау белән кызыксынуын искәртте. Олег Коробченко шулай ук Аньхой провинциясе делегациясен 13-15 ноябрьдә Казанда узачак «Ростки: Россия – Кытай» халыкара форумына, шулай ук Татарстан Республикасында планлаштырылган башка халыкара чараларга чакырды.

Татарстанда лифт җитештерү заводы ачылды

«Зеленодольск» сәнәгать паркы мәйданчыгында «Татлифт» ҖЧҖ лифт җиһазлары җитештерү заводын ачу тантанасы узды. Чарада Татарстан Республикасы Рәисе Рөстәм Миңнеханов, республика сәнәгать һәм сәүдә министрының беренче урынбасары Родион Карпов һәм башкалар катнашты. Кунаклар җитештерелә торган продукция линиясе һәм лифт җиһазлары үрнәкләре белән таныштылар. «Бүген бездә бик күңелле вакыйга, – диде Татарстан Рәисе. – Без Татарстан лифтлары җитештерүне башлап җибәрәбез. 2020 елда без бу проектны карадык, һәм бүген ул монда инде тәкъдим ителде. Продукция җитештерү буенча зур планнар бар, бу – тизлекле лифтлар да, башка модельләр дә. Барысының да килеп чыгачагына шик юк. Хәерле юл!»

апрель, 2024 ел

ТР Хөкүмәте Йортында 3D-басма һәм калдыкларны югары температурада утильләштерү үзәге проектларын тәкъдир иттеләр

23 апрельдә Татарстан Рәисе Рөстәм Миңнеханов җитәкчелегендә «Татнефтехиминвест-холдинг» АҖ Директорлар советы утырышы узды. Чарада республиканың сәнәгать һәм сәүдә министрының беренче урынбасары Родион Карпов катнашты.

ЯҢАЛЫКЛАРГА ЯЗЫЛУ