Төркиянең «Гемонт» компаниясе җитәкчелеге белән очрашу
Бүген ТР Хөкүмәте Йортында Татарстан Республикасы Премьер-министры Илдар Халиков Төркиянең «Гемонт» компаниясе генераль директоры Мөхетдин Акташ белән очрашты. Очрашуда ТР Премьер-министры урынбасары - Татарстан Республикасы сәнәгать һәм сәүдә министры Алберт Кәримов катнашты.
Кунакларны сәламләп, Илдар Халиков Татарстан Республикасы өчен Төркия стратегик партнер булып калуын билгеләп үтте. Узган елда тышкы сәүдә әйләнеше 200 млн. доллардан артып киткән.
Татарстан Республикасы Премьер-министры ассызыклаганча, «Гемонт» компаниясе Татарстанда үзен яхшы яктан күрсәткән. И.Халиков Акташ әфәндегә "ТАИФ-НК" АҖ белән файдалы хезмәттәшлеге һәм Түбән Кама шәһәрендә авыр калдыкларны тирән эшкәртү Комплексында күләмле, сыйфатлы итеп башкарылган төзелеш-монтаж эшләре өчен рәхмәтен җиткерде.
Аннары очрашуда катнашучылар алга таба хезмәттәшлекне үстерү юнәлешләре хакында фикерләштеләр. Аерым, Мөхетдин Акташ республика территориясендә табак прокат җитештерү буенча металлургия комплексын булдыру проектын тәкъдим итте.