ЯҢАЛЫКЛАР

Бүген Альберт Кәримов Татарстан Республикасы Президенты делегациясе составында Харбин шәһәренә (Хэйлунцзян провинциясе, Кытай Халык Республикасы) килде. Татарстан делегациясе визиты 15-19 июньдә Харбин шәһәренең Халыкара күргәзмә һәм конференц-үзәгендә уза торган VI Россия-Кытай ЭКСПО-2019 халыкара күргәзмәсенә багышлана.

Визитның бай программасы төрле рәсми һәм эшлекле чараларны үз эченә ала: ТР Президенты Р.Н.Миңнехановның Хэйлунцзян провинциясе губернаторы Ван Вэньтао белән очрашуы, Татарстан делегациясенең "Татарстан-Хэйлунцзян" эш форумында катнашуы һәм VI Россия-Кытай ЭКСПО 2019 экспозициясен каравы.

Көннең икенче яртысы Кытай компанияләре вәкилләре белән эшлекле очрашуларга багышланган иде. Делегация Харбинның "Corner" фәнни-техник компаниясендә һәм "Wondersun diary" сөт җитештерү компаниясендә булды.

Эш программасы кысаларында ТР Президенты Хэйлунцзян провинциясенең Кытай Коммунистлар партиясе комитеты секретаре Чжан Цинвэй белән очрашты.

Татарстан Республикасы Хөкүмәте һәм Хэйлунцзян провинциясенең Халык Хөкүмәте арасында сәүдә-икътисадый, фәнни-техник һәм мәдәни хезмәттәшлек турындагы килешүгә Чаралар планын имзалау агымдагы визитның мөһим этабына әйләнде.

Харбин шәһәренә визит VI Россия-Кытай ЭКСПО 2019 кысаларында Татарстан Республикасы сәнгать осталары концертын карау белән тәмамланды.