ЯҢАЛЫКЛАР


7
февраль 2018 ел.
чәршәмбе

Татарстан Республикасы Премьер-министры урынбасары – Татарстан Республикасы сәнәгать һәм сәүдә министры Альберт Кәримов бүген Хэйлунцзян провинциясенең территориаль үзәге – Харбинда (КХР) эш сәфәрен кыла. Россия делегациясе составында ул Россия-Кытай төбәкара хезмәттәшлек елларын ачу тантанасында катнашты.

Тантана Харбин опера театрында узды. Россия һәм Кытай гимннары яңгырау белән вакыйгада катнашучыларга Кытай Дәүләт Советы премьеры урынбасары Ван Ян мөрәҗәгать итте. Ул катнашучыларның барысын да Төбәкара хезмәттәшлек еллары ачылу белән котлады һәм Кытай Халык Республикасы Рәисе Си Цзиньпин исеменнән сәламләү адресын укыды. Аның юлламасында билгеләнгәнчә, бүген Россия белән Кытай илләре актив үсеш ала һәм аларның үсеш юллары билгеле бер дәрәҗәдә бер-берсенә туры килә. Кара-каршы Елларны уздыру илләр арасындагы элемтәләрне киңәйтү буенча өстәмә импульс бирергә һәм дәүләтләр арасындагы мөнәсәбәтләрдә яңа якты сәхифәгә әйләнергә тиеш, дип саный Си Цзиньпин.

Россия Федерациясенең ДФО буенча вәкаләтле вәкиле Юрий Трутнев шулай ук катнашучыларны кара-каршы Еллар ачылу тантанасы белән котлады һәм дәүләт башлыгы Владимир Путинның очрашуда катнашучыларга булган мөрәҗәгатен укыды. Россия Президенты күләмле Россия-Кытай проектының аерым төбәкләр һәм, тулаем алганда, илләр арасындагы партнерлык мөнәсәбәтләрен үстерүдә әһәмиятле булуын ассызыклады.

Алга таба Ван Ян, Юрий Трутнев, шулай ук Хэйлунцзян Чжан Цинвэй провинциясендә Кытайның Коммунистлар партиясе комитетының беренче сәркатибе һәм Россия Федерациясенең КХР Гадәттән тыш һәм вәкаләтле илчесе Андрей Денисов символик рәвештә Россия-Кытай төбәкара хезмәттәшлек елларына старт бирде.

Шулай ук бүген Альберт Кәримов Хэйлунцзян провинциясе Вице-губернаторы Не Юньлин белән очрашты. Очрашу барышында яклар берничә юнәлеш буенча алга таба хезмәттәшлек итү мәсьәләләре турында сөйләште, актуаль темалар буенча уртак чишелеш адымнарын билгеләде.

Татарстан Республикасы Сәнәгать һәм сәүдә министрлыгы хәбәр итә: Россия Сәнәгать министрлыгы Россия Федерациясе Хөкүмәтенең 2013 елның 30 декабрендәге 1312 карары белән расланган Кагыйдәләр нигезендә гражданлык сәнәгатенең өстенлекле юнәлешләре буенча фәнни-тикшеренү һәм сынау-конструкторлык эшләре уздыруга киткән чыгымнарның бер өлешен компенсацияләү өчен Россия оешмаларына, мондый оешмалар белән комплекслы инвестиция проектларын тормышка ашыру кысаларында, федераль бюджеттан субсидияләр бирү өчен оешмаларны сайлап алуны тәэмин итү максатларында технологик юнәлешләр исемлеген формалаштыру өчен тәкъдимнәр җыя башлады.

Тәкъдимнәр җыю 2018 елның 06 мартына кадәр Сәнәгатьнең дәүләт мәгълүмат системасында гамәлгә ашырыла, түбәндәге адрес буенча: https://gisp.gov.ru/cabinet/org/request/tn/?add=1&year=2018

Белешмә өчен мәгълүмат: 

Ксенофонтов Олег Викторович, тел. +7 (495) 632-88-05, E-mail: ksenofontov@minprom.gov.ru;

Соболевский Павел Сергеевич, тел. +7 (495) 632-84-69, E-mail: sobolevskiy@minprom.gov.ru.

2018 елның 06 мартыннан соң килгән тәкъдимнәр каралмаячак.


6
февраль 2018 ел.
сишәмбе

“Татнефть” компаниясе белгечләре “Ел инженеры” россиякүләм конкурсында янә лауреат булды.

Конкурс ел саен Россиянең һәм Халыкара фәнни һәм инженер иҗтимагый берлекләре тарафыннан А.М.Прохоров ис. инженер фәннәре академиясе һәм фәнни-техник прогресска булышлык күрсәтү буенча төбәкара фонд катнашында уза.

Россиякүләм конкурсындагы жюри карары нигезендә “Ел инженеры” конкурсында лауреат исеме Ринат Әфләтүновка (“Елховнефть” НГТИ), Реналь Исламовка (“Елховнефть” НГТИ), Игорь Бабичевка (“Татнефть” ГАҖ скважиналарны капиталь ремонтлау һәм пластларның нефть бирүчәнлеген арттыру идарәсе), Ирек Фәттаховка (“Татнефть” ГАҖ скважиналарны капиталь ремонтлау һәм пластларның нефть бирүчәнлеген арттыру идарәсе), Марат Маликовка (“Әлмәтнефть” НГТИ), Константин Маякинга (“Татнефть” ГАҖ Бөгелмә механика заводы), Дмитрий Пищаевка (“Лениногорскнефть” НГТИ), Владлен Подаваловка (“Баулынефть” НГТИ); Ленар Сәгыйдуллинга (“Җәлилнефть” НГТИ); Олег Сәлимовка (“ТатНИПИнефть”), Марат Хисаметдиновка (“ТатНИПИнефть”) бирелде.

“Яшьләрнең инженерлык иҗаты” версиясе буенча “Ел инженеры” конкурсында Денис Нуриев (“ТатНИПИнефть”) лауреат булды.

“Россиянең профессиональ инженеры” исеме Рөстәм Сәлимуллинга (“Инженерия үзәге”) һәм Фәрит Хаҗиповка (“Әлмәтнефть” НГТИ) бирелде.

 

“Татанефть” ГАҖ матбугат хезмәте материаллары буенча

Бүген, Мәскәүгә булган эшлекле сәфәре кысаларында, Татарстан Республикасы Президенты Рөстәм Миңнеханов Россия Федерациясе сәнәгать һәм сәүдә министры Денис Мантуров белән очрашты.

Очрашу барышында Рөстәм Миңнеханов һәм Денис Мантуров берничә уртак профиль программаларының үтәлеше, шулай ук 2018 елда Татарстан белән РФ Сәнәгать министрлыгының үзара хезмәттәшлеге турында сөйләште.

Исегезгә төшерик, Россия Федерациясе сәнгать һәм сәүдә министры быелның гыйнвар аенда Татарстанда булган иде. Денис Мантуров Казандагы предприятиеләрне һәм аларның продукцияләрен карады. Сүз М.П. Симонов исемендәге сынау-конструкторлык бюросы һәм С.П.Горбунов исемендәге Казан авиация заводы турында бара.


5
февраль 2018 ел.
дүшәмбе

Бүген, 5 февраль көнне, һава торышы шактый начарлану аркасында 6-10кВ электр челтәрләрендә массакүләм өзеклекләр теркәлде.

16.00 сәгатьтә кулланучыларны электр белән тәэмин итүне торгызу эшләре тулысынча төгәлләнде. “Челтәр компаниясе” ААҖнең 4 филиалындагы 36 бригаданың (104 кешенең һәм 36 берәмлек махсус техниканың) оператив һәм көйләнгән эше аркасында сарыфларны минимальләштерү мөмкин булды.

Компаниядә электр белән тәэмин итүнең нормаль схемасын торгызуны координацияләү буенча штаб тәүлек буе эшләвен дәвам итә. Алга таба климат басымнары күзәтелгәндә мөмкин булган куркынычларны булдырмау максатында Татарстан Республикасының барлык муниципаль районнарында да социаль-әһәмиятле объектларны һәм яшәешне тәэмин итү пунктларын электр белән тәэмин итү махсус контрольгә алынды.

Бүген ТР Президенты Рөстәм Миңнеханов җитәкчелегендәге Татарстан Республикасы делегациясе Махачкалада Дагыстан Башлыгы вазыйфаларын вакытлыча башкаручы Владимир Васильев белән очрашты.

Очрашу кысаларында ике төбәк җитәкчесе Сәүдә-икътисади, фәнни-техника һәм мәдәни хезмәттәшлек турында килешүгә һәм аны тормышка ашыру буенча Чаралар планына кул куйды. Рөстәм Миңнеханов ассызыклап узганча, Килешү тулы бер юнәлешләр рәтен үз эченә ала. “Безнең төбәкләр арасындагы сәүдә әйләнеше хәзерге вакытта берничә миллиард сум тәшкил итә. Без бу күрсәткечне биш мәртәбә арттыру бурычын куярга тиеш, дип саныйм. Мин ышанам, мондый мөмкинлек бар. Татарстан белән Дагыстан – болар ике зур базар. Без бирегә автомобильләр, шиннар, нефть химиясе һәм аны эшкәртүдән алынган продукцияләр, азык-төлек продуктлары китерәбез, шул ук вакытта сездән сыйфатлы шәрабләр, коньяклар, сарык ите, виноград һәм башка төрле продукцияне алабыз”, – диде ТР Президенты.

Өстәп әйтик, гамәлдәге чоры биш елга исәпләнгән Хезмәттәшлек турында килешү ике төбәк башлыгының кара-каршы очрашуының йомгаклау өлеше булды. Узган елның декабрь аенда Дагыстан делегациясе Татарстанга килгән иде, ул вакытта алар икътисадның һәм иҗтимагый тормышның төрле өлкәләрендә алдынгы тәҗрибәләре һәм казанышлары белән танышты.

Шул ук көнне Дагыстанның сәүдә-сәнәгать министры Йосыф Умавов белән Татарстан Республикасы сәнәгать һәм сәүдә министры урынбасары Алмаз Хөсәенов ике ведомство арасындагы хезмәттәшлек турында килешүгә кул куйды.

Дагыстанның авыл хуҗалыгы министры вазыйфаларын вакытлыча башкаручы Кәримхан Абасов белән Татарстанның авыл хуҗалыгы министры урынбасары Олег Земсков та хезмәттәшлек турында аналогик килешүгә кул куйды.

Шулай ук төбәкләрнең вәкилләре “Биржа мәйданчыгы” сатып алулар системасыннан файдалану өлкәсендәге уртак эшне дә көйләү турында сүз куешты. Дагыстан Республикасының Эшкуарлык һәм инвестицияләр агентлыгы җитәкчесе вазыйфаларын вакытлыча башкаручы Бәшир Магомедов белән “ТР Дәүләт заказы агентлыгы” АҖ генераль директоры Яков Геллер тиешле килешүне имзалады.

Исегезгә төшерик, Татарстанның Президент җитәкчелегендәге делегациясе Дагыстанга хезмәттәшлекнең конкрет юнәлешләре турында сөйләшү максаты белән барды. Визит кысаларында делегация Махачкаладагы КФҮ офисында, шулай ук Дагыстанның берничә сәнәгать объектында булды.

4 февральдә, Татарстан Республикасы Президенты карары буенча, республикадагы дәүләт хакимияте, җирле үзидарә органнары һәм предприятиеләр өчен “Югары әзерлек режимы” игълан ителде. “Челтәр компаниясе” ААҖ техник директоры Илшат Галимҗанов җитәкчелегендә “Челтәр компаниясе” ААҖ аварияләрне кисәтү һәм бетерү буенча тәүлек буе эшләүче штаб төзелде.

5 февральдә, 6.00 сәгатьтән хәзергәчә, начар һава шартлары (юеш кар, бозлы яңгыр, буран, бозлавык һәм көчле җил, 19-25 м/с кадәр көчле җил) аркасында 6-10 кВ бүленеш челтәрләрендә массакүләм рәвештә электр энергиясеннән өзү очраклары теркәлде.

Татарстан Республикасы буенча 10:00 сәгатьтә: 6-10кВ 10 һава линиясе; 6-10 кВ 226 трансформатор подстанциясе һәм 72 торак пункт электрсыз калды. Һава шартлары Буа, Тәтеш, Кама Тамагы, Яшел Үзән, Биектау, Питрәч, Арча, Алексеевск, Спас, Яңа Чишмә районнарында һәм Казан шәһәрендә яшәүчеләрне утсыз калдырды. 15 меңнән артык кеше электр белән тәэмин мәхрүм ителде.

Авария-торгызу эшләренә 104 кеше һәм 36 берәмлек махсус техника составында 36 бригада җәлеп ителде. Буа, Казан, Идел буе һәм Чистай электр челтәрләрендә белгечләр тарафыннан эш алып барыла. Климат басымнары аркасында алга таба куркынычлар барлыкка килмәсен өчен, республиканың башка районнарында да профилактика чаралары оештырылды.


2
февраль 2018 ел.
җомга

Казан вертолет заводының Директорлар советы карары нигезендә Юрий Пустовгаров предприятиенең яңа генераль директоры итеп билгеләнде. Татарстан Республикасы Президенты Рөстәм Миңнеханов, Ростех дәүләт корпорациясе авиация кластерының индустрия директоры Анатолий Сердюков һәм “Вертолеты России” холдингы генераль директоры Андрей Богинский предприятие коллективын яңа җитәкче белән таныштырды. Заводның генераль директоры вазыйфасын биләгән Вадим Лигай 2007 елдан башлап “Вертолеты России” холдингы генераль директорының инфраструктура үсеше буенча урынбасары вазыйфасына билгеләнде.

Рөстәм Миңнеханов Владимир Лигайга завод җитәкчесе постында уңышлы башкарган хезмәте өчен рәхмәт белдерде. ТР Президенты билгеләп узганча, Вадим Лигай авиация сәнәгате өлкәсендә белгечләр әзерләү мәсьәләләренә һәм, тулаем алганда, республиканың социаль-сәяси тормышына зур игътибар биргән.

“Вадим Александрович Казан вертолет заводын 10 ел җитәкләде. Шушы вакыт эчендә Ансат вертолетларын серияле җитештерү һәм тиешле урынга җиткерү, җитештерү куәтләрен күләмле модернизацияләү өлешендә берничә әһәмиятле мәсьәлә хәл ителде. Әлбәттә инде, уңышлар да, заказлар җитәрлек булмауга бәйле проблемалар да булды. Ләкин мин ышанам, әлеге предприятиенең потенциалы бик зур. Шуңа күрә дә, һичшиксез, Казан вертолет заводы алга таба да “Вертолеты России” системасында алдынгы предприятие булачак”, – диде Татарстан Президенты.

“Вадим Александровичка Казан вертолет заводында күп еллык уңышлы хезмәт иткәне өчен рәхмәт белдерәсем килә. Аның җитәкчелегендә завод шактый уңышларга иреште – Ансат вертолетлары серияле рәвештә җитештерелә һәм тиешле урыннарга җиткерелә башлады, предприятиедә модернизацияләү һәм техник яктан яңача җиһазлау буенча күләмле программа старт алды, бүгенге көндә ул 90%ка үтәлгән. Хәзерге вакытта завод алдында яңа бурычлар тора: серияле рәвештә Ми-38 чыгару, җитештерүне диверсификацияләү, гражданлык продукциясе өлешен һәм санитар авиация программасын үстерү кысаларында җитештерелгән продукцияне тиешле урыннарга җиткерүләрне арттыру. Әле максатларны яңа директор Юрий Пустовгаровка тормышка ашырырга туры киләчәк, ул Күмертау авиация җитештерү предприятиесендә үзен идарәче директор сыйфатында күрсәтте”, – дип билгеләде “Вертолеты России” холдингы генераль директоры Андрей Богинский.

Вадим Лигай Казан вертолет заводында гомере буе эшләгән, предприятиедәге хезмәт эшчәнлеге 1976 елда инженер-конструктор вазыйфасында башланып киткән һәм генераль директор вазыйфасына кадәр юл узган. Аның җитәкчелегендә берничә әһәмиятле проект тормышка ашырылган.

Заводның яңа директоры Юрий Пустовгаров 2015 елның декабреннән башлап, “Вертолеты России” холдингы составына керүче Күмертау АҖП идарәче директоры постын биләгән иде.

Бүген “ТАНЕКО” АҖ хезмәт коллективының конференциясе булды, аның барышында предприятиенең җитештерү эшчәнлегенә, 2017 елгы Коллектив шартнамәсе шартлары үтәлешенә йомгак ясалды, шулай ук 2018 елга бурычлар билгеләнде.

Чарада Татарстан Республикасы Премьер-министры урынбасары – Татарстан Республикасы сәнәгать һәм сәүдә министры Альберт Кәримов, “Татнефть” ГАҖ профсоюз комитеты рәисе Гомәр Яруллин, Түбән Кама муниципаль районы башлыгы Айдар Метшин катнашты.

2017 елда эш йомгаклары турында доклад белән конференция делегатлары алдында “ТАНЕКО” АҖ генераль директорының икътисад һәм финанслар буенча урынбасары Владимир Федотов чыгыш ясады. Ул билгеләп узганча, хисап чорында 7,848 миллион тонна нефть чималы эшкәртелгән. Тулаем алганда, ел буенча эшкәртү тирәнлеге 99,24% тәшкил иткән, үтәкүренмәле нефть продуктлары чыгару – 87,5%.

“ТАНЕКО” предприятиесендә 50 миллион тонна нефть эшкәртү 2017 елгы әһәмиятле вакыйга булган. 2017 елның 15 апреленнән 14 маена кадәр уздырылган планлы капиталь ремонт барышында зур эш башкарылган. Шушы чорда нефть химиясе һәм нефть эшкәртү комплексына караган җайланмаларның озак, ышанычлы һәм куркынычсыз эшләвен тәэмин итүгә юнәлдерелгән тулы бер чаралар комплексы башкарылган.

Башка нефть эшкәртү заводлары белән “ТАНЕКО” эшчәнлеген чагыштырып, Владимир Федотов беренчел эшкәртү куәтләрен эшләтү (115,25% артык) буенча предприятие Россия Федерациясендә лидер позициясен тота, дип искәртте.

2017 елгы Коллектив шартнамәсен үтәү нәтиҗәләре һәм 2018 елгы Коллектив шартнамәсе проекты турында “ТАНЕКО” АҖ профком рәисе Гөлнара Мөҗипова сөйләде. Хәзерге вакытта предприятиедә өч мең ярымнан артык кеше эшли. “Иң яхшы коллектив шартнамәсе” VII республика конкурсында яуланган беренче урын хезмәткәрләрнең якланганлык дәрәҗәсенең югары булуы турында сөйли. Шулай ук “ТАНЕКО”ның профсоюз оешмасы “Татнефть” ТПП предприятиеләренең иң яхшы беренчел профсоюз оешмасы” конкурсында да җиңеп чыккан.

2018 ел бурычлары турында конференциядә катнашучыларга “ТАНЕКО” АҖ генераль директоры Леонид Алехин билгеләде. Иң әһәмиятлеләре арасында ул җитештерүдә сәнәгый һәм экологик куркынычсызлык тәэмин итүне; чималны үтәкүренмәле нефть продуктларының күләме, тирәнлеге һәм сайлап алынуы буенча расланган планнарга туры китереп эшкәртүне; керосинны гидрочистарту, дизель ягулыгын гидрочистарту, каталитик креикинг, ЭЛОУ-АВТ-6 эшен башлап җибәрүне; автомобильләр өчен Регуляр-92 һәм Премиум-95 бензиннары җитештерә башлауны атады.

Конференция делегатлары тарафыннан 2018 елга “ТАНЕКО”ның Коллектив шартнамәсе кабул ителде. Предприятиенең иң яхшы хезмәткәрләренә республика, муниципаль һәм корпоратив бүләкләр тапшырылды.

“Татнефть” ГАҖ матбугат хезмәте материаллары нигезендә.


1
февраль 2018 ел.
пәнҗешәмбе

2018 елның 19 февралендә Татарстан Республикасы Сәнәгать һәм сәүдә министрлыгы, Татарстан Республикасы Сәүдә-сәнәгать палатасы һәм Татарстан Республикасының Сәүдә үсеше советы ярдәмендә, товар җитештерүчеләр өчен укыту семинары уздырачак.

“Лента”ның рәсми вәкилләре товарлар белән тәэмин итүчеләр белән эшләүдә үз стандартлары турында сөйләячәк һәм сәүдә-сатып алу сессиясе уздырачак. “Alibaba” халыкара сәүдә мәйданчыгы вәкилләре әлеге системаның эш кагыйдәләре һәм аның ярдәмендә Россия компанияләренең бүген ни рәвешле яңа сату базарларына чыгулары турында сөйләячәк.

Чара Казан ш., Пушкин ур., 18 йорт адресы буенча урнашкан Татарстан Республикасы Сәүдә-сәнәгать палатасы бинасында узачак.

Катнашу өчен түбәндәге адрес буенча теркәлү кирәк: https://lenta.sovettorg.ru

Чараның программасы:

13.30 – 14.00 катнашучыларны теркәү, Татарстан Республикасындагы товар җитештерүчеләр күргәзмәсен карау, сәламләү каһвәсе

14.00 — 14.10 кереш сүз

14.10 — 15.00 “Alibaba” электрон сәүдә мәйданчыгы презентациясе һәм Татарстан Республикасында товар җитештерүчеләр өчен мөмкинлекләре

15.00 — 15.10 “Лента” СЧ коммерция хезмәте презентациясе, сораулар һәм җаваплар

15.10 — 15.20 Лента” СЧ  сыйфат бүлеге презентациясе, сораулар һәм җаваплар

15.20 — 15.30 Лента” СЧ операцияләр хезмәте презентациясе, сораулар һәм җаваплар

15.30 — 15.40 Лента” СЧ EDI (электрон документ әйләнеше) буенча презентациясе, сораулар һәм җаваплар

15.40 – 17.00 Лента” СЧ белән сәүдә-сатып алу сессиясе, хезмәттәшлек турында беренчел сөйләшүләр


ЯҢАЛЫКЛАРГА ЯЗЫЛУ
Copyright © 2003 — 2018
Татарстан Республикасы Министрлар Кабинеты
Яндекс цитирования