ЯҢАЛЫКЛАР

Бүген “Алабуга” махсус икътисади зонасында тулысынча автомат җыю BarsTechnology линиясендә аккумуляторлы батарейлар заводының Россиядәге беренче чираты эшли башлады. Тантаналы чарада Татарстан Республикасы Президенты Рөстәм Михнеханов, Татарстан Республикасы Премьер-министры урынбасары – Татарстан Республикасы сәнәгать һәм сәүдә министры Альберт Кәримов, шулай ук ТР министрлыклары һәм ведомстволары вәкилләре катнашты.

“Биредә нинди уникаль технологияләрнең кулланылуы турында күреп торабыз. Сез барлык экология нормаларын да үтисез. Һәм шунысын да исәпкә алырга кирәк, бүген бөтен дөнья электромобиль тарафына борыла. Сез биредә әлеге тармакның киләчәген формалаштырасыз”, – диде Рөстәм Миңнеханов.

ТР Президенты шулай ук дәүләт булышлыгының күздә тотылган барлык төрләреннән һәм формаларыннан файдалану өлешендә предприятие җитештерүчәнлеген дә уңай бәяләде.

“Мин ышанам, бу әле башы гына. Сезнең киләчәк яхшы һәм без сезгә киләчәктә дә теләктәшлек күрсәтеп торачакбыз”, – диде Рөстәм Миңнеханов.

Заводның максаты – 2022 елга кадәр җитештерүне елына 4 млн АКБ кадәр арттыру, автомобильләр өчен аккумуляторлы батарейлар базарында Россиядә алдынгы уенчылар урынын яулау һәм илнең автомобиль заводларын АКБ белән тәэмин итү буенча әйдәүче җитештерүчегә әйләнү. Проектка булган инвестицияләр күләме 1,6 млрд сум тәшкил иткән. 100 эш урыны булдырылган, тулы проект куәтенә ирешелгәндә алар саны 350гә җитәчәк. Проектны тормышка ашыруга кертелгән инвестицияләрнең тулы күләме якынча 3 млрд сумга җитәргә тиеш.

Заводның икенче чиратын инде 2019 елда ук сәнәгый эксплуатациягә кертү планлаштырыла. Ул чакта чыгарыла торган продукциянең еллык күләме елына 3 млн аккумуляторга җитәргә тиеш, бу исә Россиядәге барлык базарларның 15%ын тәшкил итәчәк.

Исегезгә төшерик, элегрәк Россия Президенты Владимир Путин импорталмаш кысаларында сәнәгать үсешен иң стратегик бурычларның берсе буларак билгеләде. “Үзебезнең ил сәнәгатендә эш активлыгын үстерүгә теләктәшлек белдерү, яңа, уңышлы производстволарның барлыкка килүен стимуллаштыру мөһим һәм, әлбәттә инде, тармакның нәтиҗәле үсешен тоткарлый торган системалы мәсьәләләрне хәл итәргә кирәк”, – диде ул.

Илдә сәнәгать үсеше дәүләт башлыгының 2012 елдагы май указларының берсе (№ 596 “Дәүләтнең дәвамлы икътисад сәясәте турында”) нигезендә гамәлгә ашырыла.

Бүген “Алабуга” МИЗ территориясендә Татарстан Республикасы Президенты Рөстәм Миңнеханов катнашында минерал ташламалар җитештерү буенча завод нигезенә беренче таш салу тантанасы булды. Чарада Татарстан Республикасы Премьер-министры – Татарстан Республикасы сәнәгать һәм сәүдә министры Альберт Кәримов катнашты.

Минерал ташламалар җитештерү буенча проект әле 2017 елның сентябрендә генә “Алабуга” МИЗ резиденты статусын алган иде. Производство 2018 ел азагында эшли башлар дип көтелә. Аның проект куәте – елына 120 мең тоннан продукция. “Инко-ТЭК Агро Алабуга” ҖЧҖ комплекслы минерал ташламалар чыгарачак.

“Әлеге проект Татарстан буенча да, тулаем алганда илебез буенча да, агросәнәгать комплексы өчен бик әһәмиятле, – диде ачылыш вакытында Рөстәм Миңнеханов. – Без шушы юнәлештә хәрәкәт итәчәкбез. Мин ышанам, әлеге продукциянең экспорт потенциалы зур, чөнки билгеле бер компонентлары безнең республикада табыла”.

“Бу принципиаль яңа продукт булачак. Без комплекслы гранулалы ашлама чыгарырга планлаштырабыз, алар аерым культуралар өчен генә түгел, ә үзенчәлекләрен исәпкә алган конкрет кырлар өчен дә булачак”, – дип аңлатты компания җитәкчесе Александр Бабынин.

Производство нефть табу белән авыл хуҗалыгы сәнәгате кисешендә төзелә, проект тормышка ашырылганда нефтьчеләрнең күп кенә уйлап табылган әйберләре уңышлы гына гамәлгә кертелә. Шул рәвешле предприятие, уңыш дәрәҗәсен арттыру белән берлектә, аграр сәнәгатькә экологиялелекнең заманча дәрәҗәсенә күчү өчен импульс та бирәчәк, дип аңлатты ул.

9 декабрьдә Берләштерелгән Милләтләр Берләшмәсе инициативасы белән Халыкара коррупциягә көрәш көне билгеләп үтелә. 2013 елда шушы көнне Мексика шәһәре Меридада узган Сәясәт конференциясендә коррупциягә каршы БМО конвенциясе имзалана.

Халыкара коррупциягә каршы көрәш көнен гамәлгә куюның максаты коррупция проблемасын һәм аңа каршы көрәштә коррупцияне кисәтүдә Конвенция ролен аңлауны тирәнәйтүдән гыйбарәт.Дәүләтләр әлеге явызлыкка каршы көрәштә халыкара хезмәттәшлекне ныгытырга сүз куеша.

Бүгенге көндә Конвенциягә 140 тирәсе дәүләт кушылган һәм 80 тирәсе дәүләт ратификацияләгән. Алар арасында – Россия, Әзербәйҗан, Беларусь, Кыргызстан, Латвия, Таҗикстан һәм Төрекмәнстан. Әлеге халыкара шартнамә коррупциядә гаеплеләрне кисәтү, гаеплеләрне җәзага  тарту чараларын, шулай ук аңа каршы көрәштә халыкара хезмәттәшлек механизмнарын күздә тота. Ул әгъза-дәүләтләрне коррупциягә каршы тору сәясәтен уздырырга, тиешле законнарны хупларга һәм шушы күренешкә каршы көрәшү өчен махсус органнарны гамәлгә куярга йөкли.

Бу көнне дөньяның күп кенә илләрендә Халыкара коррупциягә каршы көрәш көненә багышланган демонстрацияләр, очрашулар, конференцияләр, семинарлар һәм башка чаралар уза. Россия дә – искәрмә түгел. Иҗтимагый оешмалар, мәгариф учреждениеләре, хакимият вәкилләре, хокук саклау структуралары һәм битараф булмаган барлык гражданнарның тырышлыгы белән күпчелек Россия шәһәрләрендә бу көнне төрле акцияләр һәм чаралар уздырыла, коррупциянең зыяны һәм аңа каршы көрәш методлары турында листовкалар һәм плакатлар чыгарыла.

6 декабрьдән 7сенә кадәр Казанда “Производство белән идарә итүнең заманча методлары хисабына оборона-сәнәгать комплексында хезмәт җитештерүчәнлеген арттыру” III фәнни-гамәли конференция узды. Чара Идел буе дәүләт физик культура, спорт һәм туризм академиясе мәйданчыгында Россия Федерациясе Хәрби-сәнәгать комиссиясе, Россия Сәүдә-сәнәгать министрлыгы, Татарстан Республикасы Хөкүмәте, “Менеджмент академиясе” АКО булышлыгы белән узды.

Конференция эшендә РФ Хәрби-сәнәгать комиссиясе коллегиясе рәисе урынбасары Олег Бочкарев, Россия Федерациясе икътисадый үсеш министры ярдәмчесе Юлия Урожаева, Татарстан Республикасы Премьер-министры Алексей Песошин, Татарстан Республикасы Премьер-министры урынбасары – Татарстан Республикасы сәнәгать һәм сәүдә министры Альберт Кәримов, шулай ук Россиядәге берничә оборона предприятиеләре вәкилләре катнашты.

Конференциянең төп максаты ОСК предприятиеләрендә хезмәт җитештерүчәнлеген арттыруга юнәлдерелгән заманча методларны һәм идарәлек коралларын куллану буенча күрсәтмәләр эшләү буларак билгеләнде, – әлеге мәсьәләләр пленар утырышта күтәрелде.

Үзенең докладында ТР Премьер-министры урынбасары – Татарстан Республикасы сәнәгать һәм сәүдә министры Альберт Кәримов билгеләп узганча, җитештерүчәнлекне арттыру – илләр һәм төбәкләр өчен көндәшлеккә сәләтле булу дәрәҗәсен һәм икътисадый үсешне арттыруда әһәмиятле фактор булып тора. Ул хәбәр иткәнчә, Татарстан сакчыл эш башкару технологиясен гамәлгә кертә башлаучылар арасында беренчеләрдән булды, ә бу процессның драйверы КАМАЗ булды.

Аның сүзләреннән аңлашылганча, 2013 елда хезмәт җитештерүчәнлеген арттыру буенча төбәк программасы кабул ителгән. Татарстан Республикасында әлеге программа гамәлдә булган чорда – 2013 елдан 2016 елларга кадәр – Компетенцияләр үзәге булдырылган, эшләрне оештыру буенча норматив-методик нигезләмәләр эшләнгән.

Сайлап алынган 22 катнашучы-предприятиедә Компетенцияләр үзәге белгечләре тарафыннан, проект предприятиеләре төркемнәре белән берлектә, түбәндәге юнәлешләр буенча проект алды техник-икътисадый тикшеренүләр комплексы уздырылган: реинжиниринг, технологик модернизация һәм техник яктан яңача коралландыру, предприятие структурасын оптимальләштерү, сакчыл җитештерү, идарәлекнең автоматлаштырылган системаларын кертү һәм җитештерү логистикасын оптимальләштерү һ.б.

Ул хәбәр иткәнчә, Татарстан Республикасы сәнәгать һәм сәүдә министрлыгы җитәкчелегендә катнашучы предприятиеләрдә хезмәт җитештерүчәнлеген арттыру буенча эшләнгән программалар турында сөйләшү һәм программаларга кертелгән проектларны килештерү, шулай ук аларга дәүләт булышлыгын күрсәтү турында сөйләшү буенча йомгаклау киңәшмәләре уздырылган. Аның сүзләреннән аңлашылганча, проектлар предприятиеләр тарафыннан, дәүләт ярдәмен җәлеп итеп, үз һәм заем акчалары хисабыннан актив рәвештә тормышка ашырыла.

“Ике ел эчендә хезмәт җитештерүчәнлеге 23%ка артты, ә “ПОЗИС”та – 80%ка”, – дип билгеләде ТР Премьер-министры урынбасары – Татарстан Республикасы сәнәгать һәм сәүдә министры Альберт Кәримов.

Альберт Кәримов билгеләп узганча, хезмәт җитештерүчәнлеген арттыру буенча төбәк программасы кысаларында, кооперацияне стимуллаштыру максатларында, республикада якорь предприятиеләре тирәсендә сәнәгый кластерлар формалаштырыла. Сәнәгый кластерларны үстерүне яңа төр продукцияне җитештерүгә һәм импорталмашуга юнәлдерелгән уртак проектларны тормышка ашыру юлы белән гамәлгә ашыру күздә тотыла.

Асылда, республика программасын тормышка ашыру кысаларында, Казан медицина кораллары заводы базасында “Медтех” пилот сәнәгый кластеры формалашкан. Кластер яңа сәнәгый продукциясе төрләрен булдыруга юнәлдерелгән уртак проектларны тормышка ашыру максатында булдырылган, шул исәптән импорталмаш; өстәлгән бәяне үстерү; яңа эш урыннары булдыру; яңа технологик чишелешләрдән файдалануны гадиләштерү һәм технологияләр трансферын тәэмин итү  кысаларында.

Моннан тыш, хәзерге вакытта хезмәт җитештерүчәнлеген арттыру буенча төбәк программасы Татарстан Республикасы Хөкүмәте ягыннан республикадагы сәнәгать предприятиеләренә ярдәм күрсәтүдә нәтиҗәле корал булып тора. Программа предприятиеләрне оештыру һәм технологик үзгәрешләр кертүне стимуллаштыруга юнәлдерелгән.

“2020 елга федераль программада катнашучы-предприятиеләрдә хезмәт җитештерүчәнлеген 2017 ел базасы белән чагыштырмача арттыру 15% тәшкил итәчәк”, – дип өстәде Альберт Кәримов.

Россия Федерациясе икътисадый үсеш министры ярдәмчесе Юлия Урожаева “Хезмәт җитештерүчәнлеген арттыру һәм мәшгульлеккә булышлык күрсәтү” федераль программасы турында сөйләде. Асылда, әлеге программаның төп элементлары аталды: җитештерүчәнлекне арттыру буенча төбәк программаларын эшләү, компетенция буенча федераль үзәк һәм тулы бер төбәк компетенцияләр үзәкләре булдыру, хезмәт җитештерүчәнлеген арттыруны стимуллаштыру буенча закон чаралары җыелмасын кабул итү.

Конференция барышында дүрт тематик секция буенча утырышлар узды. №1 “Производствода хезмәт эшчәнлеге” секциясендә сәнәгать предприятиеләрендә сакчыл җитештерү методларыннан файдалану проблемалары турында сүз барды, аның модераторы булып “КАМАЗ” ГАҖ Җитештерү системасын үстерү комитеты рәисе Игорь Малясёв чыгыш ясады.

№2  “НИИ һәм КБ хезмәт эшчәнлеге” секциясе ОСК өчен яңа эшләнмәләр проектлау һәм эшләү буенча сакчыл җитештерү методларын куллану үзенчәлекләренә багышланган иде. Модераторы булып “Россия космос системалары” АҖнең программа-максатчан планлаштыру буенча директоры Елена Асанова чыгыш ясады.

№3 “Хезмәт эшчәнлеге һәм персоналны мотивацияләү” секциясендә персоналны сакчыл җитештерүне оештыруга җәлеп итү һәм эшендә җитештерүчәнлекне арттыру буенча хезмәткәрләрне мотивацияләү буенча актуаль проблемалар турында сөйләшенде. Дискуссиянең модераторы – “Росэлектроника” АҖ генераль директоры урынбасары – статс-сәркатип Арсений Брыкин.

Татарстан Республикасы Сәнәгать һәм сәүдә министрлыгы белән “ТР МК каршындагы Энергияне сакчыл куллану үзәге” ДАУ – Татарстан Республикасы хезмәт җитештерүчәнлеге буенча төбәк компетенцияләр үзәге ярдәмендә оештырылган  №4 “Хезмәт җитештерүчәнлеген арттыру һәм РФ субъектларында эш белән тәэмин итүгә булышлык күрсәтү” өстенлекле программасын үстерү” секциясендә Россия төбәкләрендә хезмәт җитештерүчәнлеген арттыру программаларын тормышка ашыруның төбәк үзенчәлекләре һәм Татарстан Республикасы тәҗрибәсе турында фикер алышынды. Модераторы булып Юлия Урожаева чыгыш ясады.

Икенче көнне, 7 декабрьдә, конференциядә катнашучылар Татарстан Республикасының дүрт предприятиесе: Казан мотор төзү җитештерү берләшмәсе, Серго исемендәге завод, Казан вертолет заводы һәм Яшел Үзәннең А.М.Горький исемендәге завод буйлап экскурсияләргә юнәлде.

Шулай ук, А.М.Горький исемендәге Яшел Үзән заводын карау барышында, делегатлар заводның хәрби һәм хезмәт даны музеенда булды, судно төзү һәм машина төзү цехларын карады, хәрби судно төзү өлкәсендәге иң яңа эшләнмәләр һәм киләчәге булган проектлар белән танышты. КМПОда кунаклар Ремонт производствосында һәм җыю цехында булдылар, биредә аларга Предприятиедә сакчыл җитештерүне үстерү тарихы турында, гамәлгә кертелгән СҖ кораллары һәм методлары турында, шулай ук ирешелгән нәтиҗәләр турында сөйләделәр.

Моннан тыш, конференция делегатлары шулай ук “Машина төзелеше. Металл эшкәртү. Казан” һәм “TechnoСварка” күргәзмәләрен ачу тантанасында катнаштылар һәм бу күргәзмәләрне карап чыктылар.

Конференция материаллары