Россиядә эшче белгечлекләр буенча яшь профессионаллар арасында иң яхшылары ачыкланды
Узган атнада Көньяк-Саханлинда "WorldSkills Russia - 2018" илкүләм чемпионатының "Яшь профессионаллар" конкурсы финалы булды. Татарстан Республикасы җыелма командасы гомумкоманда зачетында көмеш яулады.
Сайлап алу ярышлары быелның апреленнән июнь аена кадәр узды. ТР Сәнәгать һәм сәүдә министрлыгына яшь профессионаллар конкурсында 25 компетенция беркетелгән иде. Финалга 14 конкурсант чыкты, алар төрле дәрәҗәле 13 медаль яулады: 5 алтын, 5 көмеш, 3 бакыр һәм осталык өчен 2 медаль. 8 компетенциядә катнашучылар призлы урыннарны яулады: визуаль мерчендайзинг, авыр техникага хезмәт күрсәтү, авиация техникасын утырту, табаклы металл эшкәртү, электроника, мехатроника, прототиплар әзерләү, эретеп ябыштыру технологияләре. Ике компетенция – лабораториядә химик анализ һәм сәнәгый автоматика буенча 500дән артык балл туплап, осталык өчен медаль алу насыйп булды (Medallion for Exellence).
Җиңүчеләрнең барысы да республикадагы урта-һөнәри белем бирү йортларында белем ала.
Җиңүчеләрне тәбрик итәбез!